اسمي شاهندة انا عابرة جنسيا و حرة الميل الجنسي
في الجامعة , بيستبعدوني من معظم الشغل و الدراسه رغم اني قبل اعلان هويتي و ميولي مكانش بيتم استبعادي و كنت دايما موجوده لكن بعد ما اعلنت عن كوني " شاهنده " كل حاجه اتغيرت كل حاجه بقت اسوأ ده حتى الطلاب بقو بيحرضو الدكاتره عليا , ممكن اكون قاعدة في محاضرة يرمو عليا كلام بصوت عالي, لو هتكلم في المحاضره او مع الدكتور يتكلمو عشان يسكتوني ومتكلمش , في مرة ناس من الجامعة دخلو كلمو واحد صاحبي و قالوله "انت تعرف ده" فرد قالهم ايوه دي بنت صاحبتي قالوله دي مش بنت ده ولد معانا في الجامعه وهددوه انهم يعملوله مشاكل في حياته بسببي , وجوه الجامعه في مره اتلمو عليا واخدو مني النضاره و فضلو يزقوني ولما بيلاقو حد بيقولي يا انتي بيقولوه " انت بتقوله انتي ليه ده ولد "
انما الدكاتره ففيهم دكتور اتحرش بيا عشان كان عارف اني مش هعمل حاجه عشان الجامعه كلها بتعاملني بعنصرية فمحدش هيهتم باللي هقوله ..
في وقت ما اتعرضت لتمييز جوه مجتمع الميم.ع نفسه كانو بيوصموني اني مش بنت كفايه و شخص دخلت معاه علاقة قالي انتي مش بنت كفايه و مش هقدر امشي معاكي في الشارع
انما على مستوى مكان سكني فممكن يحدفو عليا طوب في الشارع و بيمارسو عليا عنف لفظي و بيسألوني " انت واد ولا بت " " ما تيجي نعملك كشف حمامه " بضطر اجري عشان محدش يعمللي حاجه بعد اللي حكيته من قصتي حابه اقول اني بنت بدون اي تعقيدات , بنت عابرة جنسيا لكن هم شايفيني مستباحه ممكن يعتدو عليا بالضرب او بالكلام , انا اكيد حابه اخد حقي و حريتي من غير ما اتعرض للتمييز من غير ما المجتمع يتعامل معايا بالشكل اللي هو شايفني بيه من غير ما يشوفني مسخ حقي زي حق اي حد ماشي في الشارع مش لازم يترميلي كلمة مش لازم تحصل حاجه مش لازم احس ان في حاجه غلط.